Dempús dera aprobacion des videoactes des sessions anteriores_ 19 de deseme de 2019 e 13 d’hereuèr de 2020 se passe ath següent orde deth dia:

2)- AUFÈRTA EMPLEC PUBLIC DETH 2020 PARCIAU (2 VIGILANTS MUNICIPAUS)

Aran Amassa vòte ua ABSTENCION  pr’amor que pensam que damb ua plaça de mès, que representarie recuperar es dus vigilants fixes tot er an, n’i aurie pro e en tot cas dotar-les damb es recorsi de besonh entà operar per separat. Entara sason d’iuèrn agarrar un refòrç.

Pensam qu’era auta plaça se poderie reconvertir en ua plaça d’assisténcia sociau, que harà fauta entàs moments que vieràn.

3)- HONS SOCIAU DER AJUNTAMENT DE NAUT ARAN AN 2019

Aran Amassa vòte ua ABSTENCION. Vedem ben es ajudes ath personau funcionari e eth laborau, mès non vedem es ajudes entàs còssos. Aguest an ei atau mès calerie recuperar, com ère abans, hè fòrça ans tà darrèr, a on es còssos non entrauen en aguestes ajudes, pr’amor qu’eri ja dispausen des sòns salaris e non ac consideram coma un besonh sociau tada eri.

Rebrembam qu’Aran Amassa pòrte en sòn còdi ètic non auer privilègis.

4)-

A) APROBACION INICIAU MODIFICACION NUM 1/2020 PRESSUPÒST AJUNTAMENT DE NAUT ARAN

Aran Amassa vòte ua ABSTENCION pr’amor que non a participat en aguestes modificacions e voleríem rebrembar qu’es aportacions les calerie hèr segontes es besonhs des pòbles. Per ua auta part èm d’acòrd damb era partida de sòs entà netejar es finques rustiques pr’amor qu’aguesta  injeccion de sòs revertirà en ua creacion de lòcs de trabalh, temporaus mès ua oportunitat de trabalh.

B) APROBACION INICIAU MODIFICACION NUM 2/2020 PRESSUPÒST AJUNTAMENT DE NAUT ARAN

Aran Amassa vòte en CONTRA pr’amor qu’era SOLETA ajuda que se contemple pensam que non ei adequada ara realitat deth moment, ne ara urgéncia ne gravetat dera situacion, ne ara nautada des recorsi d’aguest ajuntament.

Aran Amassa s’a aufèrt en diuèrses ocasions entà collaborar, a enviat prepauses, des quaus non auem recebut responsa, e pensam que se poderien aufrir un aute tipe d’ajudes deuant dera situacion de fòrça trabalhadors en ERTES, sense trebalh, deuant dera incertesa deth moment, en plen estat d’alarma sense saber quan s’acabarà… Ajudes as comèrci que les calerà hèr inversions entà protegir-se entà daurir, o que non se poderàn plantejar daurir segontes es aforaments e es mesures que se demanen.

Insistim en que non ei ua mesura dolenta, mès de cap manèra ei era avienta ad aguest moment, ne ara ugéncia, dilhèu la calerie tier en compde més tà deuant, mès cau que sigue complementada damb un aute tipe d’ajudes e mesures. Insistim en amassarmos totes es formacions politiques e sectors deth teritòri entà compartir, debàter e aportar entà  gésser d’aguesta situacion.

5)- APROBACION PLEC DE CONDICIONS ENTARA CONCESSION ADMINISTRATIUA TARA INSTALLACION, DESMONTATGE E SUBMINISTRAMENT DER ENLUMENAT E DECORACION PUBLICITÀRIA DES ARBES DE NADAU 2020 EN MUNICIPI DE NAUT ARAN

Aran Amassa vòte en CONTRA , com en anterior viatge votam en contra pr’amor non èm d’acòrd damb era mercantilizacion der espaci public, pensam qu’enguan es decoracions an estat pro corrèctes, austères e omogenèes en toti es pòbles e mos agradaria contunhar en aguesta linha.

6)- APROBACION NORMATIUA CONCESSION SUBVENCIONS EXTRAESCOLARS ENTÀS FAMILHES RESIDENTES EN MUNICIPI DE NAUT ARAN. ANUALITAT 2020.

En aguest punt Aran Amassa vòte A FAVOR. Ei ua bona iniciativa entà ajudar directament as familhes.

7) – APROBACION PLEC DE CONDICIONS E DOCUMENTACION VENTA PARCÈLA MUNICIPAU EN PLAN PARCIAU NUMERO 2 DE BAQUEIRA.

En aguest punt Aran Amassa vòte ua ABSTENCION. Trapam ben era disposicion d’aguesti sòs entà reservar ua grana partida entara residéncia, mès mos manque un aute tipe d’abitatge sociau en municipi.

8)- ADESION ATH DECALÒG ENTARA RECUPERACION SOCIOECONOMICA DES MUNICIPIS DE CATALONHA. ACM-FEMP. PANDEMIA COVID-19. Aguest punt ei sonque d’informacion.

Aran Amassa ei d’acòrd damb era adhesion mès rebrembre que i a d’auer coeréncia damb hèts. Més enlà des demanes as institutcions superiores, en decalòg deishe clar ua seria de punts qu’es administracions locaus an de priorizar e refortilhar, sustot en ajudes sociaus e deth teishit empresariau e autonoms deth territròri entre fòrça d’autes causes.

Des d’Aran Amassa, donques, demanam complir e tirar tà deuant damb tot çò que i a en decalòg en çò qu’ei possible per ua adminsitracion locau qu’a es recorsi economics e umans coma er Ajuntament de Naut Aran. *Vos adjunhem eth Decalòg.

9)- MOCION PRESENTADA PER ARAN AMASSA : ALTERNATIUES AS PRODUCTES D’UN UNIC EMPLEC ENES EVENIMENTS PUBLICS.

Aguest punt, que pensam qu’ei de gran interès e coerent tamb çò que mos vierà en un futur immediat, se place entà més tà deuant.

Comprenem que non ei urgent a tractar en aguest plen e i èm d’acòrd.

10)-

A) AHÈRS D’URGÉNCIA: Aprovació Provisional del Pla Especial Urbanístic (PEU) per a la implantació d’una planta de tractament d’àrids a Arties, en un sector de SNU ocupat per les instal·lacions de l’empresa Hormaran SA dins del terçon d’Arties e Garòs al T.M. de Naut Aran.

Aran Amassa hè ua ABSTENCION pr’amor que no a agut temps de poder tractar er ahèr en assamblada. Atau que deisham enes mans dera Junta de Govèrn aguest ahèr.

B) PRECS E QÜESTIONS

Sus era sollicitud d’un vesin de Naut Aran dera benediccion des tèrmes tà Santa Creu, totes es fomacions politiques coincidissen qu’en un estat d’alarma non se pòt hèr, e esta d’acòrd en hestejar era hèsta mes tà deuant.

Aran Amassa insistís qu’era comunicacion der Ajuntament de Naut Aran a d’éster ua comunicacion agil e continuadamb es ciutadans deth municipi en tot tier-les ath corrent de tot çò que sigue deth sòn interès e besonh.

 

PREPAUSES ARAN AMASSA

– Remercam era importància d’equipar ben, damb seguretat, ara brigada entà continuar hènt es trabalhs de desinfeccion damb era periodicitat de besonh, o era que considère eth baile, enes espacis mès concorregudi de toti es pòbles.

– Insistim en amassar-mos totes es formacions politiques e es representants des pòbles periodicament deuant dera gravetat deth moment entà pensar, debàter, compartir idies e besonhs deth municipi. Auem d’èster proactius en auançar-mos a diferenti escenaris possibles, pensant diferenti plans de contingéncia e entà poder aportar, amassa, solucions e prepauses en toti es ahèrs possibles relacionadi damb era situacion extraordinària dera Covid19. Arregraïm era acceptacion deth baile e quedam entà amassar-mos toti es deluns.

– Demanam qué se harà damb es sòs dera Diputacion: 49.000€ Naut Aran, 18.000 Arties e Garòs a 10.000 entà cada ua des EMD’s restantes. Enquià qu’era Diputacion se posicione, non saberam en què se poderàn gastar es sòs. Eth baile prepause que siguen invertidi en tests entà toti es abitants deth municipi, se Sanitat ac permet.

– Pensam qu’er Ajutnament aurie de dar més informacion ara poblacion a trauès deth Bando, insistir ena predisposicion telefonica entà resòler dobtes e besonhs des abitants deth municipi e ampliar es canaus de comunicacion en tot daurir un hilat sociau, ua pagina de facebook.

Provedir de mesures de proteccion e seguretat, coma mascaretes, a toti es abitants deth municipi, com ja estàn hènt d’auti ajuntaments.

Méter en coneishement der Ajuntament er hilat de Makers3D entà aufrir ua ajuda economica en tot provedir-les de materiau, se i a demanes pr’amor que mos cònste que d’auti ajuntaments ac an hèt.

Demanam saber quini seràn es critèris de contractacion dera Brigada d’ostiu des pòbles e dera brigada forestau entà limpiar es finques rustiques, eth numèro de persones que se contrataràn e quina durada auràn es contractes. Amplien dues persones, respècte der an passat, era brigada des pòbles; era aufèrta gesserà en Bando a trauès deth SOC e es contractes seràn de prumèrs de junh enquia dempús dera Diada.

– Prevision d’installacion d’antenes entà dar cobertura 5G. Mos diden qu’enquia que non i age fibra optica non i pòt auer 5G. Dilhèu aguest 5G arribarà en 3-4 ans.

– Ampliacion dera Via ferrada d’Arties a nivèu K7; ei ua òbra e ei adjudicada a  Escola de Muntanya de Pònt de Suert.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información. ACEPTAR

Aviso de cookies